नेपाल पत्रकार महासंघ कास्की शाखाको भवन शिलान्यास गरिएको छ । भौतिक योजना तथा निर्माण मन्त्रालयका सचिव दीप बस्नेत र पत्रकार महासघंका महासचिव पोषण केसीले बिहीवार पोखराको पार्दीमा भवनको शिलन्यास गर्नुभयो । १ रोपनीको क्षेत्रफलमा पत्रकार महासंघ कास्कीले १ करोड ५९ लाख रुपैयाँको लागतमा तीन तले भवन निर्माण गर्न लागेको हो । भवन शिलन्यास समारोहमा मन्त्रालयका सचिव बस्नेतले पत्रकारहरु सदैव सत्य तथ्यका पक्षधर भएको हुदाँ भवन निर्माण गर्नु महत्वपूर्ण कार्य भएको बताउनु भयो ।
पुनरावेदन अदालत पाटनको फैसला प्रशासन कार्यालयले अबज्ञा गर्दा नुवाकोटको विदुरमा सर्वसाधारणले वर्षौदेखि सरकारी जग्गा कब्जा गरी बसेका छन् । जिल्ला प्रशासन कार्यालय नुवाकोटको मुल गेट अगाडि सार्वजनिक जग्गा अतिक्रमण हुँदा समेत प्रहरी प्रशासन मौन वसेको छ । प्रशासनले कब्जा गरिएका घर, टहरा नहटाउँदा वास्तविक सुकुम्वासीहरु भने पीडित भइरहेका छन् । पुनरावेदन अदालत पाटनले २०६३ साल कात्तिक १ गते जग्गा सार्वजनिक भएको फैसला गर्दा समेत प्रशासनले सुकुम्वासीका नाममा गरिएको जग्गा अतिक्रमणले बजार विस्तारको सौन्दर्यतामा प्रश्न चिन्ह खडा हुँदा समेत हटाउन नसकेको छ।
धादिङको अमर्खुसिमस्थित कालिका कन्सट्रक्सनका तीन वटा ट्रिपर संयुक्त जातिय मुक्ति मोर्चाका कार्यकर्ताले आगजनी गरेका छन् । कन्सट्रक्सनका प्रोपाइटर शिबराम रेग्मीका अनुसार ना ३ ख ३२३८, ना ४ ख २६२५ र न ४ ख ८३९७ नम्वरका ट्रिपरमा आगजनी गरेर राती नै उनीहरु भागेका थिए । ट्रिपरमा लगाएको आगो स्थानीयवासीले निभाएका थिए । तर आगजनीवाट तीनवटै ट्रिपर ध्वस्त भएका छन् । घटनाको जिम्मेवारी संयुक्त जातिय मुक्ति मोर्चाका जिल्ला इन्चार्ज प्रितमले लिएका छन् । कन्सट्रक्सनले क्रसर उद्योग बन्द नगरेकोले कारबाही गरेको उनले जानकारी दिए
