हुर्जाको वार्षिक साधारणसभाको तयारी तिव्र

मानवअधिकार पत्रकारिता पुरस्कार घोषणा हुने मानवअधिकार उल्लंघन विरुद्ध सञ्चार अभियान भन्ने मूल नाराका साथ स्थापित मानवअधिकार पत्रकार संघ (हुर्जा) कास्कीले आफनो वार्षिक साधारणसभा भव्यताका साथ मनाउने भएको छ । यहि चैत्र २५ गते शनिबार साधारणसभा मनाईने निर्णय हुर्जा कास्कीको मङ्गलबार बसेको बैठकले गरेको हो । साधारणसभा भव्य र सभ्य तरिकाले मनाउनका लागि संघका उपाध्यक्ष राजेश पराजुलीको संयोजकत्वमा मुल समिति र विभिन्न उपसमिति गठन गरिएको संघका महासचिव वीरेन्द्र सापकोटाले बताउनुभयो । विभिन्न उपसमितिअन्तर्गत प्रचार–प्रसारमा वीरेन्द्र सापकोटा र दिनेश आचार्य, मञ्च व्यवस्थापनमा कमल सुवेदी र सुसिल श्रेष्ठ, जलपान/खाजा व्यवस्थापनमा अर्जुन गिरि र असफल गौतम, अतिथि व्यवस्थापनमा कृष्ण अञ्जान ज्ञवाली र वीरेन्द्र सापकोटा, अतिथि सत्कारमा निशा प्रजापति र अञ्जली महर्जन, आर्थिक व्यवस्थापनमा राजेश पराजुली र अर्जुन गिरि रहनुभएको छ । वार्षिक साधारणसभाका दिन अहिलेसम्म हुर्जा कास्कीले गरिरहेको काम, कर्तव्य, अधिकारका साथै आगामि दिनमा कस्ता कार्यक्रमहरु सञ्चालन गर्ने विषयमा समेत छलफल हुने भएको छ । यसैबिच उक्त साधारणसभामा मानवअधिकारका क्षेत्रमा क्रियाशिल रुपमा रहेर काम गरिरहेका पत्रकारहरुलाई प्रोत्साहन गर्ने उद्देश्यले मानवअधिकार पत्रकारिता पुरस्कार घोषणा गर्न लागिएको संघका अध्यक्ष कृष्ण अञ्जान ज्ञवालीले बताउनुभयो । पुरस्कार राशिमा सहयोग तथा आफनै वा आफना परिवारका नाममा पनि पुरस्कार स्थापना गर्न सकिने तथा संघले स्थापना गर्न लागेको पुरस्कारमा सहयोग गर्न पनि हुर्जा कास्कीले सम्पूर्ण राजनीतिक दल तथा दलका प्रतिनिधि, मानवअधिकारकर्मी, कानुनविद्, विभिन्न उद्योगपति तथा व्यवसायी, विभिन्न सामाजिक तथा सरकारी एवं गैरसरकारी संघसंस्था तथा तिनका प्रतिनिधिसँग आग्रह गरेको छ । यसैबिच डन न्यूज नेसनल डेलिका प्रकाशक तथा सम्पादक एवं पोखराका पत्रकार राजेन्द्र अधिकारीका पिता खिमलाल अधिकारीको स्वर्गारोहण भएकोमा शोक व्यक्त गरेको छ । अधिकारीको घरमै गएर हुर्जा परिवारले शोक सन्तप्त परिवारजनप्रति हार्दिक समवेदना प्रकट गरेको हो ।

तनहुँ सम्पर्क समाजद्वारा क्षेत्रीय शिक्षा निर्देशकलाई स्वागत

  तनहुँ सम्पर्क समाज पोखराले आफ्नो वार्षिकोत्सवको अवसर पारेर तनहुँ जिल्ला स्थायी घर भएका गोपालकृष्ण पौडेल पश्चिमाञ्चल क्षेत्रीय शिक्षा निर्देशक भई आउनुभएकोमा स्वागत एवं सम्मान गरेको छ । उक्त अवसरमा चियापान एवं शुभकामना आदानप्रदान कार्यक्रम समेत आयोजना गरिएको थियो ।
       स्वागत एवं सम्मान ग्रहण गर्दै निर्देशक गोपालकृष्ण पौडेलले स्थापना कालदेखि नै सामाजिक क्षेत्रमा उदाहरणीय कार्य गरेकोमा समाजको प्रशंसा गर्दै आफू पनि तनहुँबासी भएको गौरवान्वित भएको बताउनुभयो ।
       उहाँले तनहुँ सम्पर्क समाजको भावी योजनाहरुमा आफ्नो तर्फबाट सक्दो सहयोग गर्ने बताउँदै संस्थाको उज्वल भविष्यको लागि शुभकामना व्यक्त गर्नुभयो ।
       कार्यक्रममा अन्तर समाज महासंघ राष्ट्रिय समिति अध्यक्ष निलकण्ठ शर्मा, तनहुँ सम्पर्क समाजका सल्लाहकारहरु डा.कर्णविर पौड्याल, बृन्दा राना, पूर्व अध्यक्ष मुरलीमोहन काफ्ले, भीम गुरुङ्ग, बरिष्ठ उपाध्यक्ष गणेश थापा लगायतले  शुभकामना दिनुभएको थियो । समाजका अध्यक्ष इश्वर सुवेदीको अध्यक्षतामा सम्पन्न कार्यक्रमको संचालन महासचिव अम्बिका भट्टराईले गर्नुभएको थियो ।
       तनहुँमा स्थायी घर भई पोखरामा विभिन्न पेशा व्यवसाय गरी बस्ने तनहुँले बीच एकता, भइचारा एवं सहयोग गर्ने उद्देश्यले २०५९ चैत १३ गते विधिवत रुपमा उक्त संस्थाको स्थापना गरिएको हो ।
 

फेवाताल छेउ विदेशी नागरिकको मृत्यु

पोखरा फेवातालको पश्चिम छेउको पुम्दीभुम्दी गा.वि.स. वडा नं. १ स्थित चिसापानी  स्थानबाट १ जना विदेशी स्वीडेन नागरिक पासपोर्ट नं. ८४०५८१३२, वर्ष ५७ को  KJELL  GUNNAR  ROGER  ALENHOLT फेवातालमा डुवी वेपत्ता भएको भन्ने सूचना प्राप्त हुनासाथ यस कार्यालय तथा वडा प्रहरी कार्यालय बैदाम, पर्यटक प्रहरी समेतको सहयोगमा पश्चिम क्षेत्रीय सशस्त्र प्रहरी गण पार्दीबाट नेपाल प्रहरीको रेस्कीयू टोली द्धारा फेवातालमा पौडी खेली वेपत्ता भएका विदेशी नागरिक १६:१० बजेको समयमा मृत अवस्थामा तालबाट निकाल्न सफल भएको । फेवाताल छेउमा मृतकको नगद रु. १५२०।–, भिडियो क्यामेरा थान १, घडी, मोवाईल, सुर्य चुरोट ३ वट्टा, चस्मा, टिसर्ट १, पाईन्ट १, गमछा १ समेत साईडमा फेला परेको । मृतक लासको प्रारम्भिक अनुसन्धान पश्चात पोष्टमार्टमको लागि प.क्षे. अस्पतालको मुद्र्धा घरमा राखिएको । अन्य अनुसन्धान कार्य भईरहेको ।

जिल्ला प्रहरी कार्यालय, कास्की

Peace Zone Academy पिसजोन एकेडेमीको अभिभावक दिवस सम्पन्न

       पोखरा–८ सिमलचौर स्थित पिसजोन एकेडेमीको वार्षिक उत्सव तथा अभिभावक दिवस शुक्रबार सोंपाल तमु समाज बगालेटोलमा सम्पन्न भयो ।
       विद्यालयका संस्थापक तथा प्रमुख व्यवस्थापक योगेन्द्र शर्मा दाहालको सभापतित्व तथा जनप्रिय उच्च मा.वि.व्यस्थापन समिति अध्यक्ष बलराम बराल, विश्वनाथ बराल, गोविन्द भारती तथा रन्जिता गिरीको विशेष आतिथ्यतामा सम्पन्न उक्त कार्यक्रममा विद्यालका विद्यार्थीहरुले विभिन्न साँस्कृतिक कार्यक्रम तथा कविताहरु समेत वाचन गरेका थिए ।
       विद्यार्थीहरुको तर्फबाट कक्षा १० की छात्रा शिल्पा थापा तथा शिक्षकहरुको तर्फबाट माध्यमिक तहका गणित तथा विज्ञान शिक्षक राजु भण्डारीले स्वागत मन्तव्य व्यक्त गरेका थिए ।
       कार्यक्रममा अभिभावकको तर्फबाट विश्वनाथ बरालले विद्यालयको उत्तरोत्तर प्रगतिको कामना गर्दै विद्यालयले प्रदान गर्दै आएको गुणात्मक शिक्षा तथा अनुशासनको प्रसंसा गर्नुभएको थियो ।
       विद्यालयका संस्थापक तथा प्रमुख व्यवस्थापक योगेन्द्र शर्मा दाहालले विद्यालयबाट प्रत्येक वर्ष प्रवेशिका परीक्षामा सम्मिलित विद्यार्थीहरुमध्ये ८५ प्रतिशतभन्दा बढी अंक ल्याई सर्वोत्कृष्ट हुने विद्यार्थीलाई ‘पिसजोन विद्यापदक’ बाट सम्मानित गरिने साथै नेपाल अधिराज्यमै सर्वोत्कृष्ट पाँचमा पर्न सफल विद्यार्थीलाई ‘पिसजोन स्वर्ण पदक’ बाट सम्मानित गरिने जानकारी गराउनुभयो ।
    उक्त अवसरमा विभिन्न विधामा सर्वोत्कृष्ट हुने विद्यार्थीहरुलाई पुरस्कारसमेत वितरण गरिएको थियो ।
 कार्यक्रमको संचालन विद्यालयका प्रचार्य सुरेन्द्र शर्मा दाहालले गर्नुभएको थियो ।

पार्टी एकताका लागि राष्ट्रिय प्रतिनिधि परिषद्को बैठक उपयोगी हुने

नेकपा एमाले

  नेकपा एमालेका बैकल्पिक पोलिटव्यूरो सदस्य तथा गण्डकी इन्चार्ज खगराज अधिकारीले पार्टीको आन्तरिक व्यवस्थापनलाई सुदृढ बनाउन राष्ट्रिय प्रतिनिधि परिषद्को बैठक उपलब्धीपूर्ण हुने बताउनुभएको छ ।
       नेकपा एमालेले संचालन गरेको पार्टी सुदृढीकरण तथा जनपरिचालन अभियान २०६८ को सन्दर्भ तथा यही फागुन २१ देखि २३ गतेसम्म काठमाण्डौमा हुने राष्ट्रिय प्रतिनिधि परिषद्को बैठकमा सहभागी हुने कास्कीका नेताहरुसँग बुद्धिजीवीहरुले गरेको अन्तरक्रिया कार्यक्रममा नेता अधिकारीले त्यस्तो बताउनुभएको हो ।
       नेकपा एमाले बुद्धिजीवी इलाका कमिटी कास्कीको आयोजनामा भएको कार्यक्रममा नेता अधिकारीले राष्ट्रिय प्रतिनिधि परिषद्को बैठक पार्टीमा भावनात्मक एकता बलियो बनाउन सहयोगी बन्ने विश्वास व्यक्त गर्नुभयो ।
       संविधान निर्माणको क्रममा एमालेले सबैखाले यथास्थिति र अतिवादी शक्तिहरुलाई मिलाउँदै अगाडि बढ्ने दृढता व्यक्त गर्दै नेता अधिकारीले सामथ्र्य र पहिचानका आधारमा आर्थिक रुपमा सक्षम हुने गरी प्रदेश निर्माण गरिने बताउनुभयो ।
       शासकीय स्वरुप बारे प्रष्ट पार्दै एमाले नेता अधिकारीले एमाले जनताद्वारा प्रत्यक्ष निर्वाचित प्रधानमन्त्री र आलंकारिक राष्ट्रपतिकै पक्षमा रहेको धारणा राख्नुभयो ।
       नेकपा एमाले कास्कीका अध्यक्ष मानबहादुर जिसीले काठमाण्डौमा हुने राष्ट्रिय प्रतिनिधि परिषद्को बैठकको क्रममा हुने विशाल सभामा कास्कीबाट ७० देखि ८० बस रिजर्भ गरी एमाले कार्यकर्ता सहभागी हुने जानकारी दिनुभयो ।
       नेकपा एमाले कास्की क्षेत्र नं.३ का राष्ट्रिय प्रतिनिधि परिषद् सदस्य तथा सभासद् रविन्द्र अधिकारीले सबैखाले भावनाको कदर हुने गरी प्रदेशको विभाजन गरिनुपर्ने उल्लेख गर्दै शासकीय स्वरुपको सन्दर्भमा मिश्रित प्रणाली अपनाउन सबै पक्षलाई सहमत गराउन नेकपा एमालेले पहल गर्ने बताउनुभयो ।
       कार्यक्रममा नेकपा एमाले बुद्धिजीवी इलाका कमिटी कास्कीका अध्यक्ष श्रीकान्त खतिवडाले पार्टीको आन्तरिक व्यवस्थापन, संविधान निर्माण, राज्यको पुनःसंरचना, शासकीय स्वरुपका बारेमा अवधारणापत्र प्रस्तुत गर्नुभएको थियो ।
       सो अवसरमा नेकपा एमाले गण्डकी अञ्चल कार्यालय सचिव भीम कार्की, कास्की क्षेत्र नं.४, २ र १ का राष्ट्रिय प्रतिनिधि परिषद् सदस्यहरु क्रमशः पुण्यप्रसाद पौडेल, श्रीनाथ बराल, बेदबहादुर गुरुङ्ग लगायतका नेताहरुले राष्ट्रिय प्रतिनिधि परिषद्को बैठकमा बुद्धिजीवीहरुले उठाएका विषयहरुलाई प्राथमिकताका साथ उठाउने प्रतिवद्धता व्यक्त गर्नुभएको थियो ।
       कार्यक्रममा पेशागत महासंघ कास्कीका अध्यक्ष रामप्रसाद खनाल, बुद्धिजीवी परिषद् कास्कीका अध्यक्ष बाबुराम पौडेल, मानवअधिकार संरक्षण मञ्च कास्कीका सचिव कमलप्रसाद अर्याल, डोलराज पाण्डे, डा.कृष्ण के.सी., प्रेमनारायण खनाल लगायतका वक्ताले आ–आफ्नो विचार व्यक्त गर्नुभएको थियो ।
       पार्टी संगठन संचालन, संविधान निर्माणमा पार्टीको भूमिका प्रभावकारी हुनुपर्ने अभिप्रायका साथ सम्पन्न अन्तरक्रिया कार्यक्रममा एमाले समर्थक १ सय ३० जना बुद्धिजीवी नेताहरु तथा कार्यकर्ताहरुको सहभागिता रहेको थियो ।